Fteriotët e Sarandës në një takim kulturor

Paraqitet libri “Lame Xhama – Mësues i Popullit – Kujtime e dokumente”

Komuniteti fteriot në Sarandë, nën kujdesin e Bashkise se Sarandës, organizuan më 25 maj 2009 një takim për paraqitjen e librit “Lame Xhama – Mësues i Popullit – Kujtime e dokumente”. 

            Në këtë takim morën pjesë ish nxënës të Mësuesit të Popullit Lame Xhama, kolegë pune, miq, dashamirës, komuniteti fteriot në Sarandë si dhe të ftuar të tjerë. Morën pjesë kuadrot drejtuese të qytetit të Sarandës, Kryetari i Bashkisë së qytetit Edmond Gjoka, Kryetari i Këshillit Bashkiak të qytetit Arjan Demiri, Sekretarja e Këshillit Bashkiak Polikseni Ikonomidhi, Zv/ drejtori i drejtorisë arsimore Thoma Stefani, drejtori i gjimnazit Apostol Nika, Drejtoresha e drejtorise së kulturës Pasjonare Nika, Drejtori i Drejtorisë së turizmit të Bashkisë Aristotel Bita, Drejtori i filialit ekonomik të USHT Eduard Mehmeti,  drejtoresha e burimeve njerëzore të bashkisë Suzana Nika, Drejtori i drejtorisë juridike Krenar Abazi, drejtori i drejtorisë ekonomike Panajot Gunariu, drejtori i drejtorisë së shërbimeve Aristotel Koçi e të tjerë.

Nje bukuri te veçante i dha takimit pjesëmarrja e shume ish nxenësve e kolegëve të Mësuesit të Popullit Lame Xhama, tashmë në moshë të thyer, si Koçi Vasi, Dhimitër Tulo, Andrea Caka, Janulla Papagjika, Ana Harito, Abedin Hasani, Jasin Berberi, Jani Ballca e shumë e shumë të tjerë.

            Fteriotët e shumtë që morën pjesë në këtë takim, ndjenë krenari të ligjshme për nderin që i bëhet bashkëfshatarit të tyre – Lame Xhama, dhe shprehën mirënjohje për të, për familjen e tij që mundësoi botimin e librit dhe organizatorët e këtij takimi.

            Takimin e hapi Zëvendëskryetari i Bashkisë Robert Maçi. Fjalën e rastit e mbajti Gëzim Dusha, pastaj pjesëmarrësit në takim, edhe gjate kokteit, folën për figurën e Lame Xhamës dhe treguan kujtime që kishin me të.

Nga fjala e z. Gëzim Dusha:

Të nderuar të ftuar dhe ish nxënës të Mësuesit të Popullit Lame Xhama, të dashur fteriotë !

            Jemi mbledhur sot në këtë takim të përbashkët kulturor, për të bërë edhe këtu në Sarandë paraqitjen e librit “Lame Xhama – Mësues i Popullit – Kujtime e dokumente”, të organizuar nga komuniteti fteriot i Sarandës nën kujdesin e Bashkisë.

            Po e nis bisedën e shkurtër për këtë libër me një citim të marrë nga një artikull i një i botuar në gazetën “Tirana Observer” e datës 7 prill 2009: “Libri i kalon përmasat e një monografie të zakonshme. Ai është një enciklopedi ku gjallon jeta e një Mësuesi të Popullit si Lame Xhama, që tërë jetën e shkriu për lirinë dhe shkollën shqipe, por edhe histori e gjallë  e Fterrës dhe Sarandës, që janë shquar për tradita arsimdashëse e liridashëse”.

            Mësuesi i Popullit Lame Xhama, edhe pse në kujtimet e tij nuk flet për vete, lexuesi zbulon portretin e tij sa të thjeshtë aq edhe të rrallë që e vendos në altarin e 100 mësuesve më të mirë të vendit.

            Mund të themi me plot gojën, siç e pohon edhe vet, se Lame Xhama është me dy vendlindje: Në Fterrën që e lindi dhe e rriti dhe në Sarandën ku punoi një jetë të tërë gati 30-vjeçare.

            Është vështirë që në një panoramë të shkurtër të japësh gjithçka për vlerat e këtij libri. Pjesëmarrësit do të marrin në dorë librin dhe do të dinë të nxjerrin vlerat jo vetëm të mësuesit Lame Xhama, por edhe të patriotit, jo vetëm të zhvillimit të arsimit dhe të shkollës në Sarandë, Delvinë, Konispol, Gjirokastër, Përmet e Kuç ku ai punoi por do të vlerësojnë kontributin e këtij mësuesi atdhetar për gjithë Shqipërinë, sepse ai është dhe do të mbetet burrë i shquar i Fterrës, Labërisë e gjithë Shqipërisë, sepse la vlera e gjurmë të pashlyeshme në historinë e arsimit shqiptar duke vënë një gur të çmuar në themelet e vetëdijes sonë kombëtare.

            Libri ka një thurje të thjeshtë, i bazuar kryesisht në kujtimet e tij, ku spikasin fotografitë dhe dokumentet e ruajtura në dekada, me vlera lokale e kombëtare.

                        Për Lamen figura e mësuesit është një perëndi e vërtetë. Me këto dimensione e kujton ai mësuesin dhe drejtorin e Normales së Elbasanit, Aleksandër Xhuvani. Prej tij, tregon ai, mora prushin e pasionit për dije, vrullin e punës, përkushtimin dhe intuitën e artit të drejtimit të shkollës.

            Ja shtojnë vlerën librit artikujt e botuar për të, emisionet në televizion e radio, kujtimet ,  vlerësimet e letërkëmbimet me kolegë e ish nxënës.

Në letrën që i dërgon kolegu dhe ish shoku i tij në Normalen e Elbasanit, Mësuesi i Popullit Fejzo Mehmeti, shkruan: “Ti ja kushtove tërë jetën arsimit dhe edukimit të brezit të ri, për t’u mësuar gjuhën dhe historinë e gjallë të popullit shqiptar”. Apo në një shkrim të Guro Zenelit ku theksohet se në profesionin e bukur të mësuesisë xha Lamia e ngriti lart nivelin e dijes dhe shkallën e nderit. Për Fterrën është jo vetëm si mësues i shquar, por edhe si simbol i patriotizmit, fisnikërisë, i edukimit familjar në shoqëri, si njeri me të gjitha vlerat njerëzore. Ndërsa ish nxënësi i tij Qamil Buxheli kujton se përveç dijes që përçonte Lame Xhama, do edukonte një brez të madh patriotik, që do ti kushtohej lirisë dhe vendit.

            Po e mbyll këtë diskutim më fjalët e fundit të kujtimeve të tij të cilat sot tingëllojnë si një mesazh aktual për çdo njeri “ O njerëz të mirë, jetojeni jetën me punë e dinjitet deri në çastet e fundit të saj”